Air—“Clean pea strae.”
WHAN John an me war married,
Our haudin was but sma,
For my minnie, cankert carlin,
Woud gie us nocht ava ;
I wair't my fee wi canny care,
As far as it woud gae,
But, weel-I-wat, our bridal bed
Was clean pea strae.
Wi workin late an early,
We've come to what ye see,
For fortune thrave aneath our bans,
Sae eident ay war we ;
The lowe o luve made labour licht,
I'm sure ye'll find it sae,
Whan kind ye cuddle doun at e'en,
Mang clean pea strae.
The rose blooms gay on cairny brae,
As weel's in birken shaw,
An love will lowe in cottage low,
As weel's in lofty ha : [1]
Sae, lassie, tak the lad ye like,
Whate'er your minnie say,
Tho ye shoud mak your bridal bed
O clean pea strae.
[1] "Love's as warm among cotters as courtiers."—Alan Ramsay's "Scots Proverbs."[return]
[Semple 127]